ગુજરાતના રાજકારણમાં એક નવો ઈતિહાસ રચાયો છે. રાજ્યસભાની ખાલી પડેલી ચાર બેઠકો પર ભારતીય જનતા પાર્ટી (BJP)ના ચારેય ઉમેદવારો સત્તાવાર રીતે બિનહરીફ જાહેર થયા છે. ઉમેદવારી પત્રો પરત ખેંચવાની મુદત પૂર્ણ થતાં જ ચૂંટણી અધિકારી દ્વારા આ જાહેરાત કરવામાં આવી હતી. આ જીત સાથે જ ગુજરાતના ઈતિહાસમાં પ્રથમ વખત એવું બનવા જઈ રહ્યું છે કે રાજ્યસભામાં કોંગ્રેસનો એક પણ સભ્ય નહીં હોય. હવે ગુજરાત ક્વોટાની રાજ્યસભાની તમામ ૧૧ બેઠકો પર માત્ર ને માત્ર ભાજપના જ સાંસદો પ્રતિનિધિત્વ કરશે. આ ઐતિહાસિક ઘટનાને પગલે ભાજપ ખેમામાં ભારે ઉત્સાહનો માહોલ જોવા મળી રહ્યો છે.

વિપક્ષે હથિયાર હેઠા મૂક્યા: ચારેય ઉમેદવારો બિનહરીફ વિજેતા

રાજ્યસભાની આ ચાર બેઠકો માટે ભાજપ દ્વારા રાજેશ (રાજુભાઈ) શુક્લા, મુકેશભાઈ રાઠવા, માનસિંહ પરમાર અને જીતેન્દ્ર મેઘજીભાઈ કણઝારિયાને મેદાનમાં ઉતારવામાં આવ્યા હતા. ઉમેદવારીપત્રો પરત ખેંચવાના અંતિમ દિવસે વિરોધ પક્ષ તરફથી કોઈ જ ઉમેદવારે ફોર્મ ન ભર્યું હોવાથી અથવા કોઈ પડકાર ન હોવાથી ચૂંટણી અધિકારીએ પ્રક્રિયા પૂર્ણ કરી ચારેયને વિજેતા જાહેર કર્યા હતા. અગાઉ આ બેઠકો માટે ૧૮ જૂનના રોજ મતદાન યોજાવાનું નક્કી કરવામાં આવ્યું હતું, પરંતુ તમામ ઉમેદવારો બિનહરીફ ચૂંટાઈ આવતા હવે ગુજરાતમાં રાજ્યસભાની ચૂંટણી યોજવાની જરૂરિયાત જ રહેશે નહીં.

વિધાનસભાનું સંખ્યાબળ ભાજપની તરફેણમાં

ગુજરાત વિધાનસભામાં ભાજપનું જે પ્રચંડ પ્રભુત્વ છે, તેને જોતાં વિપક્ષ માટે આ ચૂંટણીમાં જીત મેળવવાની કોઈ વાસ્તવિક સંભાવના નહોતી. હાલમાં ૧૮૨ સભ્યોની ગુજરાત વિધાનસભામાં સત્તાધારી પક્ષ ભાજપ પાસે ૧૬૧ ધારાસભ્યોનું જંગી સંખ્યાબળ છે. તેની સામે મુખ્ય વિપક્ષ કોંગ્રેસ પાસે માત્ર ૧૨ ધારાસભ્યો અને આમ આદમી પાર્ટી (AAP) પાસે માત્ર 5 ધારાસભ્યોનું સંખ્યાબળ છે. આ નબળી સ્થિતિ અને ગણિતને સમજીને જ કોંગ્રેસ અને આમ આદમી પાર્ટીએ આ ચૂંટણીમાં પોતાના ઉમેદવારો ન ઉતારવાનો વ્યવહારુ નિર્ણય લીધો હતો, જેના કારણે ભાજપનો રસ્તો એકદમ સાફ થઈ ગયો હતો.

કોંગ્રેસ મુક્ત ગુજરાતની દિશામાં મોટું કદમ

આ ઐતિહાસિક સફળતા અંગે પ્રતિક્રિયા આપતા કેબિનેટ મંત્રી જીતુ વાઘાણીએ જણાવ્યું હતું કે, કોંગ્રેસ મુક્ત ગુજરાતની જે કલ્પના કરવામાં આવી હતી, તેની શરૂઆત ગુજરાતે કરી દીધી છે. દેશના વડાપ્રધાન નરેન્દ્ર મોદીના હોમ સ્ટેટ એટલે કે ગુજરાતમાંથી રાજ્યસભામાં કોંગ્રેસનો એક પણ સભ્ય ન હોય તેવું ઈતિહાસમાં પ્રથમવાર બનશે. તેમણે ઉમેર્યું કે આ બધું ગુજરાતની જનતાના અદભુત સમર્થનને કારણે શક્ય બન્યું છે. જનતાએ ભાજપના એટલા બધા પ્રતિનિધિઓને ચૂંટીને વિધાનસભામાં મોકલ્યા છે કે આજે વિપક્ષને રાજ્યસભાનું ફોર્મ ભરવાની પણ હિંમત ચાલી નથી.

સામાન્ય કાર્યકર્તાઓને મળ્યું મોટું સન્માન

રાજ્યસભાની આ ચૂંટણીમાં ભાજપે પોતાના પાયાના અને સામાન્ય કાર્યકર્તાઓને ટિકિટ આપીને સૌને ચોંકાવી દીધા હતા. બિનહરીફ ચૂંટાયા બાદ પક્ષના નવા સાંસદ માનસિંહ પરમારે ખુશી વ્યક્ત કરતા જણાવ્યું હતું કે, રાજ્યસભામાં બિનહરીફ ચૂંટાવું એ મારા માટે ખૂબ જ ગૌરવની બાબત છે. ભાજપે એક સામાન્ય પાયાના કાર્યકર્તા પર ભરોસો મૂકીને સંસદના ઉચ્ચ ગૃહ સુધી પહોંચવાની તક આપી છે. આ નિર્ણય એ બાબત સાબિત કરે છે કે ભારતીય જનતા પાર્ટી એ સાચા અર્થમાં કાર્યકર્તા કેન્દ્રિત વિચારધારા ધરાવતો પક્ષ છે, જ્યાં નાનામાં નાના માણસની મહેનતની કદર થાય છે.

આમ, આગામી દિવસોમાં દેશની સંસદમાં ગુજરાતનું પ્રતિનિધિત્વ કરનારા તમામ ૧૧ ચહેરા ભાજપના જ રહેશે, જે રાજ્યના રાજકીય ચિત્રમાં ભાજપના એકહથ્થુ શાસનની મહોર મારે છે.