માઉન્ટ એવરેસ્ટના બર્ફીલા પહાડો પર 30 વર્ષથી બરફમાં દટાયેલા 'ગ્રીન બૂટ' નામના મૃતદેહને નીચે ઉતારવાની તૈયારીઓ શરૂ થઈ ગઈ છે. ઈન્ડો-તિબેટીયન બોર્ડર પોલીસે એક એક્સપર્ટ હાઇ એલ્ટીટ્યૂડ રિકવરી એજન્સીની મદદ લેવા માટે ટેન્ડર બહાર પાડ્યું છે. આ કામગીરી જૂન અને સપ્ટેમ્બર વચ્ચે હાથ ધરવામાં આવશે. તેમાં છ શેરપા સામેલ થશે.

ગ્રીન બૂટ એ એક પર્વતારોહકને આપવામાં આવેલું ઉપનામ છે જેના તેજસ્વી લીલા બૂટ વર્ષોથી પર્વતારોહકો માટે એક સીમાચિહ્ન તરીકે સેવા આપી રહ્યા છે. 8,000 મીટરથી વધુની ઊંચાઈએ "ડેથ ઝોન" માં પડેલા આ મૃતદેહને વિશ્વના સૌથી ચર્ચિત પર્વતારોહણ રહસ્યોમાંનું એક માનવામાં આવે છે.

ઈન્ડો-તિબેટીયન બોર્ડર પોલીસની યોજના હેઠળ, ઓછામાં ઓછા છ અનુભવી શેરપાઓની એક ખાસ ટીમ મૃતદેહને મેળવવા માટે ડેથ ઝોનમાં જશે. આ કામગીરીનો સૌથી મોટો પડકાર દાયકાઓથી બરફ અને શૂન્યથી નીચે તાપમાનમાં પડેલા શરીરને સુરક્ષિત અને આદરપૂર્વક મેળવવાનો રહેશે. આ જવાબદારી સોંપવામાં આવેલી એજન્સીએ તિબેટમાં પ્રવેશ, ચીની અધિકારીઓ પાસેથી પરવાનગી મેળવવા, નેપાળ થઈને મૃતદેહનું પરિવહન અને તેને ભારત પરત કરવા સહિતની તમામ કાનૂની અને તકનીકી પ્રક્રિયાઓ પૂર્ણ કરવાની રહેશે.

એવું માનવામાં આવે છે કે આ મૃતદેહ એક ભારતીય પર્વતારોહકનો હોઈ શકે છે, જે ૧૯૯૬માં નોર્થ રૂટ દ્વારા એવરેસ્ટના શિખર પર પહોંચવાનો પ્રયાસ કરનારા છ ઈન્ડો-તિબેટીયન બોર્ડર પોલીસ પર્વતારોહકોમાંના એક હતા. જોકે, આજ સુધી આ વાતની સત્તાવાર પુષ્ટિ થઈ નથી. ટ્રેકિંગ નિષ્ણાતોનો અંદાજ છે કે એવરેસ્ટ પર બરફમાં આશરે ૨૦૦ મૃતદેહો દટાયેલા છે. આબોહવા પરિવર્તનને કારણે હિમનદીઓ અને બરફની ચાદર ઓગળવાથી આવનારા વર્ષોમાં આમાંથી ઘણા મૃતદેહો ફરી સપાટી પર આવી શકે છે.