અમદાવાદ સહિત રાજ્યભરમાં સીએનજી (CNG) ગેસના સતત વધી રહેલા ભાવોને પગલે આખરે રિક્ષા ચાલકોને ભાડા વધારાની મંજૂરી મળી ગઈ છે. અમદાવાદ રિક્ષા ચાલક એસોસિયેશન અને ગાંધીનગર ખાતે ટ્રાન્સપોર્ટ કમિશનર કચેરી વચ્ચે યોજાયેલી મહત્વની બેઠકમાં આ નિર્ણય લેવામાં આવ્યો છે. નવા નિર્ણય મુજબ, રિક્ષાના મિનિમમ (લઘુત્તમ) ભાડામાં રૂ. 5 નો વધારો કરવામાં આવ્યો છે, જેથી હવે મુસાફરોએ મિનિમમ ભાડા પેટે રૂ. 20 ના બદલે રૂ. 25 ચૂકવવા પડશે. આ ઉપરાંત, પ્રતિ કિલોમીટરના ભાડામાં પણ રૂ. 5 નો વધારો મંજૂર કરાતા હવે નવો ભાવ રૂ. 15 થી વધીને રૂ. 20 થઈ ગયો છે. અંદાજે ત્રણ વર્ષના લાંબા સમયગાળા બાદ રિક્ષા ચાલકોને આ સત્તાવાર ભાડા વધારાની મંજૂરી મળી છે.

છેલ્લા કેટલાક સમયથી પેટ્રોલ અને ડીઝલની સમાંતર સીએનજીના ભાવમાં પણ બેફામ વધારો ઝીંકવામાં આવી રહ્યો છે, જેણે રિક્ષા ચાલકોની કમર તોડી નાખી છે. માત્ર છેલ્લા બે મહિનાના ટૂંકા ગાળામાં જ સીએનજીના ભાવમાં રૂપિયા ૬ જેટલો મોટો વધારો થયો છે, જેના કારણે સીએનજીનો પ્રતિ કિલોનો ભાવ રૂ.88 ને પાર પહોંચી ગયો છે. બીજી તરફ, છેલ્લા ત્રણ વર્ષથી રિક્ષાના ભાડામાં કોઈ સુધારો કરવામાં આવ્યો ન હોવાથી રિક્ષા ચાલકો માટે ઘર ચલાવવું અને રિક્ષાનું મેઇન્ટેનન્સ કાઢવું અત્યંત મુશ્કેલ બન્યું હતું. મોંઘવારીના આ ડબલ મારના કારણે સૌથી વધુ પ્રભાવિત રિક્ષા ચાલકો થયા હતા, જેમની રોજિંદી આવક અડધી થઈ ગઈ હતી.

ભાડા વધારા અંગે રિક્ષા ચાલક સંગઠનો દ્વારા વાહન વ્યવહાર કમિશનરને અવારનવાર લેખિત અને મૌખિક રજૂઆતો કરવામાં આવી હતી. આમ છતાં સરકાર તરફથી કોઈ મક્કમ નિર્ણય ન લેવાતા રિક્ષા ચાલકોમાં ભારે નારાજગી અને આક્રોશ વ્યાપ્યો હતો. આખરે કંટાળીને રિક્ષા ચાલક એકતા યુનિયને જાતે જ ભાડામાં વધારો કરવાની અને તમામ ચાલકોને મુસાફરો પાસેથી નવું ભાડું વસૂલવાની છૂટ આપી દીધી હતી. યુનિયને સરકાર સમક્ષ એવી પણ માંગ મૂકી હતી કે આગામી સમયમાં પરિસ્થિતિને ધ્યાને રાખીને પ્રતિ કિલોમીટર દીઠ રૂ. ૨૦ અને મિનિમમ ભાડું રૂ. ૫૦ સુધી લેવાની સત્તાવાર મંજૂરી આપવામાં આવે.

આ ભાડા વધારાની સીધી અસર સામાન્ય અને મધ્યમ વર્ગના મુસાફરોના ખિસ્સા પર પડશે. લોકલ ટ્રાન્સપોર્ટ તરીકે રિક્ષાનો ઉપયોગ કરતા નોકરીયાત વર્ગ અને વિદ્યાર્થીઓનું બજેટ ખોરવાઈ જશે. જોકે, રિક્ષા ચાલકોના પક્ષે આ વધારો અનિવાર્ય હતો, કારણ કે ઇંધણના ભાવવધારા સામે ભાડું ન વધે તો આ વ્યવસાય ખોટનો ધંધો બની જાય તેમ હતો. ટ્રાન્સપોર્ટ વિભાગની આ બેઠક બાદ હવે સત્તાવાર રીતે નવું ભાડું અમલી બનશે, જેનાથી રિક્ષા ચાલકોને આર્થિક રાહત મળશે પરંતુ સામાન્ય જનતા પર મોંઘવારીનો વધુ એક બોજ ઉમેરાયો છે.