હવામાનની બદલાતી સ્થિતિ વચ્ચે ગુજરાતના દરિયાકાંઠે મોટું સંકટ તોળાઈ રહ્યું છે. દેવભૂમિ દ્વારકા જિલ્લાના દરિયાઈ વિસ્તારો માટે વહીવટી તંત્ર દ્વારા 'હાઈ વેવ એલર્ટ' એટલે કે ઊંચા મોજા ઉછળવાની ગંભીર ચેતવણી જાહેર કરવામાં આવી છે. રાષ્ટ્રીય આપત્તિ વ્યવસ્થાપન પોર્ટલ (NDEM) પર પ્રાપ્ત થયેલા ઇન્ડિયન નેશનલ સેન્ટર ફોર ઓશન ઇન્ફોર્મેશન સર્વિસીસ (INCOIS)ના સત્તાવાર અહેવાલ મુજબ, આગામી ૨૪ કલાક દરિયાકાંઠાના વિસ્તારો માટે અત્યંત જોખમી સાબિત થઈ શકે છે.

૨૪ કલાક દરિયો બનશે તોફાની

મળતી માહિતી અનુસાર, આ હાઈ એલર્ટ 2 જુલાઈના રોજ રાત્રે ૧૧:૩૦ વાગ્યાથી શરૂ થઈને આગામી 3 જુલાઈના રોજ રાત્રે ૧૧:૩૦ વાગ્યા સુધી અમલી રહેશે. આ સમયગાળા દરમિયાન દેવભૂમિ દ્વારકા જિલ્લાના વાડીનારથી લઈને હર્ષદ સુધીના સમગ્ર દરિયાકાંઠાના વિસ્તારમાં દરિયામાં ભારે કરંટ જોવા મળશે. દરિયાના મોજા સામાન્ય કરતાં ઘણા ઊંચા ઉછળશે, જેને પગલે તટીય વિસ્તારોમાં વહીવટી તંત્રને સાબદું કરી દેવામાં આવ્યું છે.

11 ફૂટથી ઊંચા મોજા ઉછળવાની પ્રબળ શક્યતા

વૈજ્ઞાનિક અંદાજ અને સેટેલાઇટ ડેટા અનુસાર, દરિયામાં મોજાની ઊંચાઈ ૩.૪ મીટરથી લઈને ૩.૬ મીટર જેટલી નોંધાઈ શકે છે. સરળ શબ્દોમાં કહીએ તો, દરિયામાં ૧૧ ફૂટ કે તેનાથી પણ વધુ ઊંચા રાક્ષસી મોજા ઉછળવાની પ્રબળ શક્યતા છે. દરિયાની આ આક્રમક અને તોફાની સ્થિતિ કિનારાના નીચાણવાળા વિસ્તારો માટે મુશ્કેલી સર્જી શકે છે, જેના કારણે સુરક્ષા વ્યવસ્થા સઘન બનાવવામાં આવી છે.

માછીમારો અને પ્રવાસીઓ માટે ખાસ સૂચના

દરિયાની આ ખતરનાક સ્થિતિને જોતાં વહીવટી તંત્ર દ્વારા કડક માર્ગદર્શિકા જાહેર કરવામાં આવી છે. માછીમારોને આગામી આદેશ સુધી દરિયો ન ખેડવા અને બોટોને સલામત સ્થળે લાંગરી દેવા જણાવાયું છે. આ ઉપરાંત, દરિયાઈ કામગીરી સાથે સંકળાયેલા તમામ કર્મચારીઓ અને શિપિંગ એજન્સીઓને એલર્ટ રહેવા આદેશ અપાયા છે. પવિત્ર યાત્રાધામ દ્વારકા અને આસપાસના બીચ પર મનોરંજન કે ફરવા માટે આવતા પ્રવાસીઓને દરિયા કિનારાથી સદંતર દૂર રહેવા અને સ્થાનિક પોલીસ તેમજ સુરક્ષાકર્મીઓની સૂચનાઓનું ચુસ્તપણે પાલન કરવા ખાસ અપીલ કરવામાં આવી છે.