સમગ્ર સૌરાષ્ટ્ર પંથકમાં લાંબા સમયના ઉકળાટ અને અસહ્ય ગરમી બાદ આખરે મેઘરાજાએ વિધિવત રીતે ધમાકેદાર પધરામણી કરી છે. જૂનાગઢ, ગીર સોમનાથ અને અમરેલી જિલ્લાના વાતાવરણમાં અચાનક પલટો આવ્યો છે અને કાળાડિબાંગ વાદળો સાથે વરસાદ તૂટી પડ્યો છે. આ પ્રથમ વરસાદી રાઉન્ડના કારણે સમગ્ર પંથકમાં એકાએક ઠંડક પ્રસરી ગઈ છે અને સ્થાનિક લોકોને અસહ્ય ગરમી તથા બફારામાંથી મોટી રાહત મળી છે. લાંબા સમયથી ચાતક નજરે વરસાદની રાહ જોતા જગતના તાત એવા ખેડૂતોમાં પણ હવે ખુશીનો માહોલ જોવા મળી રહ્યો છે.

વાદળોની ઓઢણી ઓઢીને બેઠો ગિરનાર પર્વત

જૂનાગઢ પંથકમાં આકાશમાં કાળાડિબાંગ વાદળો ઘેરાયા બાદ ધીમીધારે મેઘરાજાનું આગમન થયું હતું. વરસાદના આ હળવા આગમનની સાથે જ જૂનાગઢની શાન અને પવિત્ર ગણાતો ગિરનાર પર્વત વાદળોની સફેદ ચાદરમાં લપેટાઈ ગયો હતો. કુદરતના આ અદભુત મનમોહક દ્રશ્યો સોશિયલ મીડિયા પર પણ ભારે આકર્ષણનું કેન્દ્ર બન્યા છે. ચોમાસાના આ પ્રારંભિક અને સકારાત્મક સંકેતો વચ્ચે હવે ધરતીપુત્રો ચિંતામુક્ત બનીને વાવણીલાયક અર્થાત ખેતીલાયક સારા અને ભારે વરસાદની આતુરતાપૂર્વક રાહ જોઈ રહ્યા છે, જેથી ખરીફ પાકની મોસમ શરૂ કરી શકાય.

ગીર સોમનાથના ઉનામાં કાગડોળે રાહ જોતા ખેડૂતો હરખાયા

બીજી તરફ, ગીર સોમનાથ જિલ્લાના ઉના શહેરમાં પણ સવારથી જ ચોમાસુ વાતાવરણ જામ્યું હતું. દિવસની શરૂઆતથી જ વાદળછાયા માહોલ વચ્ચે ધીમીધારે વરસાદ શરૂ થતાં સ્થાનિક રહીશોએ ભારે રાહતની લાગણી અનુભવી હતી. કાગડોળે વરસાદની પ્રતીક્ષા કરી રહેલા સ્થાનિક ધરતીપુત્રોના જણાવ્યા અનુસાર, આ વરસાદથી જમીનમાં ભેજનું પ્રમાણ વધશે અને આ ચોમાસાના વિધિવત આગમનની મજબૂત શરૂઆત છે, જે આગામી દિવસોમાં કૃષિ કાર્ય માટે આશીર્વાદરૂપ સાબિત થશે.

રાજુલા-જાફરાબાદ પંથકમાં માર્ગો પર પાણી ફરી વળ્યા

અમરેલી જિલ્લામાં પણ મેઘરાજાએ પોતાનું રૌદ્ર અને ધમાકેદાર સ્વરૂપ બતાવ્યું છે. ખાસ કરીને રાજુલા અને જાફરાબાદ પંથકમાં મેઘરાજાની તોફાની એન્ટ્રી થઈ છે. રાજુલા શહેરમાં ટૂંકા સમયમાં જ સારો અને ધોધમાર વરસાદ વરસી જતાં શહેરના અનેક નીચાણવાળા વિસ્તારો અને મુખ્ય માર્ગો પર પાણી ફરી વળ્યા હતા.

આ ઉપરાંત જાફરાબાદ તાલુકાના ગ્રામ્ય વિસ્તારો જેવા કે બાબરકોટ અને મીતીયાળા, કડિયાળી અને દુધાળા સહિતના મોટાભાગના ગામોમાં સાર્વત્રિક વરસાદ નોંધાયો છે. વરસાદના કારણે ગ્રામીણ વિસ્તારોની નદી-નાળામાં નવા પાણીની આવક શરૂ થઈ છે. આ અણધાર્યા આહલાદક વરસાદથી ગ્રામજનોને ગરમીથી મુક્તિ મળી છે, તો બીજી તરફ ખેડૂતો હોંશે-હોંશે પોતાના ખેતરોમાં વાવણીના આગોતરા આયોજનમાં વ્યસ્ત બન્યા છે.