રાજકોટના નવા આંતરરાષ્ટ્રીય હિરાસર એરપોર્ટ પરથી એક હૃદય ધ્રુજાવનારી ઘટના સામે આવી છે, જ્યાં ટેકઓફના થોડા જ સમયમાં એક મોટી વિમાન દુર્ઘટના ટળી ગઈ હતી. રાજકોટથી દેશની રાજધાની દિલ્હી તરફ ઉડાન ભરી રહેલી એર ઇન્ડિયાની ફ્લાઇટ સાથે આકાશમાં જ પક્ષી અથડાવાની (બર્ડ હિટ) ગંભીર ઘટના બની હતી. પક્ષી અથડાતાની સાથે જ વિમાનમાં ભારે ફફડાટ વ્યાપી ગયો હતો અને મુસાફરોના જીવ તાળવે ચોંટ્યા હતા. જો કે, પાયલોટની અદભુત સમયસૂચકતા અને ક્ષમતાના કારણે વિમાનનું એરપોર્ટ પર જ તાત્કાલિક સુરક્ષિત ઇમરજન્સી લેન્ડિંગ કરાવાયું હતું.

મળતી વિગતો મુજબ, એર ઇન્ડિયાની આ ફ્લાઇટમાં કુલ ૧૨૪ જેટલા મુસાફરો સવાર હતા. વિમાન હજુ આકાશમાં થોડે જ ઉપર પહોંચ્યું હતું ત્યાં જ અચાનક એક પક્ષી સીધું વિમાનના એન્જિનના પંખા સાથે જોરદાર રીતે અથડાયું હતું. આ ટક્કર એટલી પ્રચંડ હતી કે એરલાઇન્સના એન્જિનની બ્લેડને મોટું નુકસાન પહોંચ્યું હતું અને એન્જિનમાં તાત્કાલિક ટેક્નિકલ ખામી સર્જાઈ હતી. પક્ષી અથડાવાની સાથે જ પાયલોટને એન્જિનમાં ગરબડ હોવાનો સંકેત મળી ગયો હતો, જેથી તેમણે જરાય સમય ગુમાવ્યા વિના કંટ્રોલ રૂમને જાણ કરી હતી.

એન્જિનની બ્લેડ તૂટવા છતાં પાયલોટે ભારે ધૈર્ય અને કુશળતા દાખવીને વિમાન પર કાબૂ મેળવી રાખ્યો હતો. વિમાનને ખૂબ જ સાવચેતીપૂર્વક પાછું હિરાસર એરપોર્ટ તરફ વાળીને રનવે પર સુરક્ષિત રીતે લેન્ડ કરાવવામાં આવ્યું હતું. વિમાન રનવે પર સફળતાપૂર્વક ઉતરી જતાં જ તમામ ૧૨૪ મુસાફરો અને ક્રૂ મેમ્બર્સે રાહતનો શ્વાસ લીધો હતો. આ મોટી હોનારત ટળતાં જ એરપોર્ટ પ્રશાસન, સુરક્ષાકર્મીઓ અને મુસાફરોના પરિવારજનોમાં વ્યાપેલો ભય દૂર થયો હતો અને એરપોર્ટ ઓથોરિટીએ પણ હાશકારો અનુભવ્યો હતો.

આ ગંભીર ઘટના બાદ તરત જ એર ઇન્ડિયાની એન્જિનિયરિંગ અને ટેક્નિકલ ટીમ એક્શનમાં આવી ગઈ હતી અને ફ્લાઇટનું રિપેરિંગ કામ યુદ્ધના ધોરણે શરૂ કરી દેવામાં આવ્યું છે. એરપોર્ટના સત્તાધીશોના જણાવ્યા અનુસાર, પક્ષી અથડાવાના કારણે એન્જિનને અંદરથી કેટલું નુકસાન થયું છે તેની બારીકાઈથી તપાસ કરવામાં આવી રહી છે. વિમાન સંપૂર્ણ રીતે રિપેર થઈ ગયા બાદ ડિરેક્ટોરેટ જનરલ ઓફ સિવિલ એવિએશન (DGCA) ની એક ખાસ એક્સપર્ટ ટીમ દ્વારા તેની ઝીણવટભરી ચકાસણી અને સેફ્ટી ઓડિટ કરવામાં આવશે.

ડીજીસીએની મંજૂરી અને ગ્રીન સિગ્નલ મળ્યા બાદ જ આ એરક્રાફ્ટનું પ્રોપર ફ્લાઇટ ઇન્પેક્શન અને ટ્રાયલ રન લેવામાં આવશે. તમામ સેફ્ટી માપદંડો અને સુરક્ષાના ધોરણો યોગ્ય જણાશે ત્યારબાદ જ આ વિમાનને ફરીથી મુસાફરો સાથે આકાશમાં ઉડાન ભરવા માટેની લીલી ઝંડી આપવામાં આવશે. બીજી તરફ, એરપોર્ટ પર અટવાઈ પડેલા ૧૨૪ મુસાફરોને દિલ્હી પહોંચાડવા માટે એરલાઇન્સ કંપની દ્વારા વૈકલ્પિક ફ્લાઇટ અથવા અન્ય વ્યવસ્થા પૂરી પાડવા પર ગંભીરતાથી વિચારણા અને આયોજન કરવામાં આવી રહ્યું છે.