પાકિસ્તાનના સૌથી મોટા શહેર કરાચીમાંથી એક અત્યંત આઘાતજનક અને ચિંતાજનક સમાચાર સામે આવ્યા છે. કરાચીની એક સરકારી હોસ્પિટલમાં ઈન્ફેક્શન કંટ્રોલ અને મેડિકલ વેસ્ટ મેનેજમેન્ટમાં થયેલી ગંભીર બેદરકારીને કારણે એચઆઈવી (HIV) નો ભયાનક પ્રકોપ ફેલાયો છે.

આ ગંભીર આસિસ્ટન્ટ સર્જિકલ અને મેડિકલ ખામીઓના કારણે નવેમ્બર ૨૦૨૫ થી અત્યાર સુધીમાં ૬ નિર્દોષ બાળકોના મોત નીપજ્યા છે, જ્યારે કુલ ૯૪ બાળકો આ જાનલેવા વાયરસથી સંક્રમિત થયા છે. આ ઘટનાએ પાકિસ્તાનની કથળતી જતી સ્વાસ્થ્ય સેવાઓ અને હોસ્પિટલોની બેદરકારી પર અનેક ગંભીર પ્રશ્નો ઊભા કર્યા છે. આ કરૂણાંતિકા અંગેનો સંપૂર્ણ વિગતવાર અહેવાલ નીચે મુજબ છે.

સિંધ પ્રાંતના સ્વાસ્થ્ય સચિવ તાહિર હુસેન સંગીના જણાવ્યા અનુસાર, આ ભયાનક પ્રકોપનો સૌથી પહેલો ખુલાસો નવેમ્બર ૨૦૨૫માં કરાચી સ્થિત ‘કુલસૂમ બાઈ વાલિકા હોસ્પિટલ’ માં થયો હતો. આ હોસ્પિટલનું સંચાલન ‘સિંધ એમ્પ્લોઈઝ સોશિયલ સિક્યોરિટી ઈન્સ્ટિટ્યૂટ’ દ્વારા કરવામાં આવે છે.

૧૬ નવા કેસ સામે આવ્યા
સ્વાસ્થ્ય મંત્રાલયના આદેશ પર ગઠિત વિશેષ તપાસ સમિતિના રિપોર્ટ અને હોસ્પિટલના સત્તાવાર રેકોર્ડ પરથી સ્પષ્ટ થયું છે કે આ ચેપ ગત વર્ષે નવેમ્બર મહિનામાં હોસ્પિટલમાં વપરાતી સંક્રમિત સોય (સીરિંજ) અને મેડિકલ ઉપકરણોની યોગ્ય સફાઈ ન થવાના કારણે ફેલાયો હતો. ત્યારથી લઈને અત્યાર સુધીમાં એચઆઈવી/એડ્સ (HIV/AIDS) વાયરસના કારણે છ માસૂમ બાળકો પોતાના જીવ ગુમાવી ચૂક્યા છે. વધુમાં ચાલુ મહિને જ વધુ ૧૬ બાળકોમાં એચઆઈવીનો પોઝિટિવ રિપોર્ટ આવ્યો છે, જેનાથી સંક્રમિત બાળકોનો કુલ આંકડો વધીને ૯૪ પર પહોંચી ગયો છે.

આસપાસના વિસ્તારમાં ૧૨૦ લોકો HIV પોઝિટિવ મળ્યા
હોસ્પિટલમાં થયેલા આ ભયાનક વિસ્ફોટ બાદ સિંધ સ્વાસ્થ્ય વિભાગે હોસ્પિટલની આસપાસના રહેણાંક વિસ્તારોમાં ઘરોઘર જઈને તપાસ કરવા માટે વિશેષ મેડિકલ ટીમો તૈનાત કરી હતી.

​​​​​​​આ તપાસ દરમિયાન આશરે ૧૦,૦૦૦ લોકોનું સેમ્પલિંગ કરવામાં આવ્યું હતું, જેમાંથી ૧૨૦ લોકો એચઆઈવી પોઝિટિવ મળી આવ્યા છે. આ સંક્રમિતોમાં બાળકો ઉપરાંત અનેક વયસ્કોનો પણ સમાવેશ થાય છે. આ તમામ લોકોને હોસ્પિટલમાં સારવાર દરમિયાન જ આ વાયરસનો ચેપ લાગ્યો હોવાની બળવત્તર આશંકા છે.

આજીવન સારવારનો સરકારી દાવો
પ્રાંતિય સરકારના સીધા આદેશ હેઠળ, સ્વાસ્થ્ય વિભાગ હવે નિષ્ણાત તબીબોની એક કમિટી બનાવીને અસરગ્રસ્ત એચઆઈવી પીડિતો માટે આજીવન મફત સારવાર અને દવાઓની વ્યવસ્થા કરી રહ્યું હોવાનો દાવો કરવામાં આવ્યો છે.